IT Park Uzbekistan Astanadan gamedev jamgʻarmasi va yangi bozor rejalari bilan qaytdi

IT Park Uzbekistan Astanaga qilgan ishchi safari natijalarini eʼlon qildi. Safar chogʻida tashkilotning eksportni rivojlantirish direktori Jahongir Qodirov AI startap ekotizimiga bagʻishlangan panel sessiya doirasida muzokaralar oʻtkazdi. Asosiy eʼlon — gamedev jamgʻarmasi. IT Parkning maʼlum qilishiga koʻra, jamgʻarma faoliyati moliyalashtirish bilan cheklanmasligi, oʻzbek oʻyinlarini nashr etish va targʻib qilishni ham qamrab olishi mumkin. Shuningdek tashkilot studiyalarga dev kitlar, ish joylari va jihozlardan foydalanish imkonini beradigan maxsus oʻyinlar ishlab chiqish hubini tashkil etishni ham koʻrib chiqmoqda. Qozogʻistonning Cyber Temple kompaniyasi bosh direktori Oljas Akparov oʻzbek oʻyin ishlab chiquvchilari va nashriyotchilariga konsalting koʻmagini taklif qildi hamda IT Park akseleratsiya dasturlarida tashqi ekspert sifatida qatnashishga kelishdi. Cyber Temple taxminan 50 ta istiqbolli PC loyihasi bilan ishlaydi. Shuningdek IT Park Koreya va Yaponiya bozorlariga chiqayotgan studiyalar va IT kompaniyalar uchun qoʻllab-quvvatlash vositalarini — ulushli, venchur va qarz moliyalashtirish modellari hamda Zero Risk va Local to Global dasturlarini — taqdim etdi. DataMatrix Corp esa IT Parkka mahalliy loyihalari soni uch-beshtaga yetgach, Oʻzbekistonda oʻz ofisini ochish niyatida ekanini aytdi; IT Park huquqiy va konsalting boʻyicha tanishtirish hamda dasturlarda ishtirok etishga yordam beradi.

Source